Gile .... bener, nasib baik kayaknya nih. Udeh lame banget ane pengin ngungkapin segale resah gelisah , sumpeh serapeh ngliaet problema jalan raya di Ibukote dan sekitarnye. Mo ngomong langsung ame gubernur mimpi kalee.....sape loe? Mo ngomong ame tetangge pasti ane diketawain abis – abisan “gile aje loe nyak... ngapaiin juga mikirin jalan raye..... mending mikirin ongkos buat anak loe besok pegi sekoleh ape mending mikirin ntar masak ape buat suami ente” . Pade saat gundah gulane makin nyesakin dade tiba-tiba ane bace pengumuman di pesbuk kalo Leutika Publisher lagi ngadain lomba nulis “Curhat Jalan Raya” . Rasenye kayak ketiban durian runtuh aje....pucuk dicinte ulem tibe. Udeh ade sarane numpahin uneg-uneg nyang dirase siape tau dapet hadiah pule... gimane gak nasib baik namenye.
Ente pade pingin tau kali ye , ane mau keluhin ape. Karne Leutika cuman bolehin ane keluhin atu topik aje kagak boleh acak kadul kemane-mane mangkenye ane milih curhatin soal saluran pembuangan air (got) mampet dan trotoar mepet di sepanjang jalanan di daerah tempat tinggal ane aje deh. Terus terang aje ye ane nyang udeh nyak-nyak ini aslinye bukan betawi . Cing.. Cang..Nyak.. Babeh ane cumen numpeng hidup dan cari makan di sini. Tapi ane udeh ngerase ini tanah tumpeh dareh masalahnye lebih separo idup udeh tinggal di kampungnye betawi. Masak kalo ade kekurangan ane kagak mau peduli, secare ane udeh dapet makan minum dari tanah ini. Pertame-tame nyampe dari kampung ane tinggal di pusatnya Ibukote. Trus karne dibawe nasib pindah sane pindah sini dan akhirnya netep lebih tige belas tahun di pinggirian Jakarte tepatnye di daerah seputaran Larangan, Tanggerang ini.
Selame ane tinggal di sekitar wilayah nyang ane sebutin tadi (ane juga beberape kali pindah rumeh maklum ane kan kontraktor sejati alias kontrak sane kontrak sini hehehe..) udeh banyek sekali perubahan dan kemajuan nyang ane lihat. Dulu (sekitar tahun 1987 – 1990) di daerah Cipadu cuman ade jalan tane nyang kalo musim ujan udeh kayak kubangan kebo dan musim kering ngebul ame debu minta ampun. Sekarang mulai dari ujung masuk dari Jl. Ciledug Raya ampe ke ujung atu lagi di Jl. Ceger Raya udeh aspalan. Malahan sebagian besar diaspal beton. Tapi sayangnye got pembuangan airnya tetep aje kecil dan dimane-mane banyak nyang kesumbat ame sampeh. Kasat mate aje kite orang awam pasti ngerti deh bile hujan deres dateng got segitu pasti kagak sanggup nampung air. Ditambah lagi masyarakat sekitar kliatannye masih kurang peduli tuk buangin sampah pada tempatnye. Parahnye lagi ade satu daerah di situ nyang lokasinya menurun sehingge setiap hujan pasti jalannye berubah jadi kali (sungai) dengan ketinggian air bise ampe sepahe orang dewase. Bisa ente bayangin gimane kendraan nyang keluar masuk disane pasti tersendet-sendet karne macet. Nyang rugi selain pemilik kendraan juga pedagang yang mencari rejeki di sepanjang jalan yang udeh cukup terkenal karena tekstil kiloannye. Kalo ente suka kutak katik si Mbah Google dijamin gampang nemu bejibun info tentang daerah ini.
Anehnye ye, udeh bolak balik jalannye diperbaiki dan lobang-lobang akibat banjir ditutupin saluran gotnya tetep aje segitu gak dilebarin apelagi didalamin. Masak lebarnya cuman kire-kire setengah meter aje. Kalo kedalemannya gak useh ditanya deh bile sampeh-sampeh nyang berserakan masuk ke sono pasti jadi tambeh dangkal aje. Nyang ane kagak abis pikir juge ape Bu Gubernur nyang berkuase di Pronpinsi tetangge Ibukote ini kagak pernah turun meninjau jalan-jalan nyang bolak balik diperbaiki ini, padahal bukan rahasia lagi bile dikelola dengan baik pasti daerah nyang ane sebut ini bisa nebelin pundi-pundi propinsinye. Daerah Cipadu udeh banyak diisi para pedagang eceran dan grosiran yang bile ditata apik bise jadi daerah perputaran fulus gede-gedean nyang secare kagak langsung akan menyejehtereen penduduk nyang bermukim di sane. Untuk mencapai itu tentu diperluin sarane jalan raya penunjang yang bagus .... iye gak Beh?!.
Selain got kecil nyang sering mampet dan bikin jalanen jadi berkuah alias banjir, sepanjang jalan ini kagak ade trotoar nyang memadai. Padahal ye sepanjang jalan ini telah berdiri pertokoan yang dimenejerin penduduk asli atawe pendatang (semisalnye orang Minang, Batak, Cina dan ade juge India). Kalau aje pemerintehnye punya insting bisnis nyang kuat serte visi dan misi jangka panjang (ceile... mission imposible kali ye...) kagak jangka pendek semate ane yakin dalam waktu kagak lame daerah Cipadu bisa nyamain Tanah Abang nyang ade di Jakarta Pusat. Sebaliknye bile care ngelolanye kagak berubeh juge ane pasti tambah sedih aje deh...hikshiks..
Biar ente nyang belom pernah ke sini ane kasi tau ye. Di sepanjang daerah Cipadu ini banyak sekali pengusaha kecil menengah yang membuka usahe. Kalo ente wisata belanje masuk ke gang-gang kecil sepanjang jalan nyang name resminya Jl. Wahid Hasyim ente bisa nemuin pengusaha kaos (tshirt) untuk anak dan dewasa, pengusaha pembuat tas wanita, tas sekolah, pengusaha konveksi pakaian dan perlengkapan bayi, perlengkapan kamar tidur (seperti sprei, kasur dan bantal) dan banyak lagi usahae-usahe lainnya. Jadi ane yakinkan ame ente semue bahwa pembuatan got yang memadai dan trotoar nyang nyaman pasti akan mendukung pengembangan daerah ini. Kalo bisa jalannya dibuat mulus kagak bolong sana-sini trus kagak ade lagi gundukan- gundukan aspal nyang membahayakan pengendara motor atawe mobil. Trotoar nyang kece pasti akan membantu pembeli dan pelancong menjadi merasa seneng berkunjung. Nyang jelas ane bisa lari pagi santai dari ujung jalan Pasar Kreo ampe ujung lain di Komplek Jurang Mangu seperti disaranin dokter nyang sering ngobatin penyakit ane ... hehehe ketauan ngelabanye deh.
Hal lain nyang bikin kesel ane ada di pertigaan keluar masuk dari Cipadu ke jalan Raya Ciledug, yaitu pas di pasar Kreo. Kalau pagi saatnye semua orang keluar rumeh nyang mo ngantor , nyang mo ke sekolah dan nyak-nyak nyang mau belanja kebutuhan dapur semua desek-desekan, karne jalannye sempit. Ditambah jalur Ciledug Raya nyang emang udeh terkenal ame macetnya. Tambeh pareh aje jadinye. Seandainya jalannye dilebarin dikit ditambeh trotoar untuk pejalan kaki kejadian senggol-sengolan nyang bikin risih dijamin kagak ade lagi. Saluran airnya juga mampet abis malahan udeh ketutup same sampeh-sampeh pasar yang ke sapu kesane.
Nah Cang Cing Nyak Babeh kalau ane kerjanya ngeluh aje kayaknya basi ye. Pasti ente semue bakal ngomong “ nyak nyang penting solusinye gimane” . Dari pade ane babak belur digebukin rame-rame ama ente karne ngeluh aje, ane nyaranin kayak gini aje ye. Ane urutin solusinye atu due tige biar kliatannye rade-rade sistimatis gitu (ceileh jadi sok ilmiah nih ye....):
1. Jajaran Pemda Tk I dan Tk II nyang kelola daerah nyang ane maksud kudu turun gunung dan melihat potensi wilayahnye ini baek-baek. Mereka kudu insyap bahwe daerah ini adalah gunung emas nyang belum ditambang.
2. Membuat perencanaan nyang mumpuni untuk melebarkan saluran pembuangan air dan pembangunan trotoar nyang apik (kali ane kagak perlu kasih gambar trotoar cantik ala jalanan di negare-negare Eropeh ye, soalnya ane yakin walikota dan gubernurnya lebih tau dari pade ane karne pasti sering tur keliling Eropeh sane)
3. Melalui pemuka masyarakat dan para pedagang nyang ada di sepanjang jalan, rencane nyang udeh disusun di no 2 itu disosialisasikan ke semua penduduk nyang ade di sane biar ntar kagak ade penolakan masyarakat nyang kagak diinginkan.
4. Dinas-dinas yang terkait turun ke masyarakat lebih sering tuk ngasi penerangan dan ajakan untuk hidup bersih, mengkelole sampah dan kagak ngebuangnye sembarangan sehingge kagak mampetin saluran air bila musim hujan dateng.
Kayaknye segitu aje deh curhat ane, soalnye kalau kebanyakan ntar ente bosen ngebacenye hehehe........
Tangerang, 13 Mei 2010
Tidak ada komentar:
Posting Komentar